Аз сокинони маҳалҳои наздимарзии тоҷику қирғиз дар минтақаҳои Воруху Чоркӯҳ гуфта шудааст, ки "тамоми ин амалҳои ғаразноку иғвогарона ва харобиовар бевосита аз ҷониби ҳайати фармондеҳӣ ва худи марзбонони Қирғизистон ташкил, роҳбарӣ ва идора карда мешавад". Бино ба ин гуфтаи ин манобеъ, нооромиҳо қадам ба қадам аз рӯи кадом як тарҳи махсус ба амал меоянд ва аз 5 ба 16 декабр ин амалҳо пайдарпай анҷом ёфта истодааст.

Рухдодҳо ба тариқи зайл аз сӯи манобеъи расмӣ ривоят мешаванд: 5 декабри соли равон як сокини деҳаи Оқсой дар марзи деҳаи Ворухро марзбонони тоҷик боздошт карданд ва дар посух қирғизҳо шоҳроҳи Исфара – Ворухро тақрибан аз 13 то 14 -и ин рӯз баста, мусофирони се микроавтобус ва зиёда аз 20 мошини сабукравро дар майдони назди қисми низомии ин маҳал, чун гаравгон нигаҳ доштанд.

11 декабр гурӯҳии марзбонони мусаллаҳи қирғиз дар маҳаллаи Сомониён ба марзи Тоҷикистон ворид шуда, монеъи деҳқонони чоркӯҳӣ шуданд, ки мехостанд заминҳои худро шудгор кунанд.

Далели марзбонони қирғиз ин буд, ки ин заминҳо баҳсиянд.

14 декабр гурӯҳе аз сокинони маҳаллаи Кӯк - Тоши деҳаи Оқсойи ноҳияи Бодканд шишаҳои тирезаҳои мағоза ва шиферҳои боми нонвойхонаи маҳаллаи Сомониёни ҷамоати деҳоти Чоркӯҳро сангборон карда, барқасдона шикастанд.

16 декабр шишаҳои мошини сабукрави шахсии сокини маҳаллаи Сомониёни деҳоти Чоркӯҳ Урмониддин Сафаровро шикаста, ба ӯ хисороти моддию молиявӣ расониданд. "Тавре шоҳидони ҳодиса изҳор медоранд, соҳибмулки мағоза ва нонвойхона ин иншоотҳоро бо мақсади хизматрасонӣ ва осон кардани мушкилоти сокинони деҳоти наздисарҳадии ҳарду ҷониб сохта буд ва аз он сокинони маҳаллаи Кок-Тош низ истифода мебурданд. Мутаассифона, ба иншоотҳои номбурда таҳти сарварии сарҳадбонони кишвари ҳамсоя хисорот расонида шуд ва субҳи рӯзи 16 декабри соли 2019 амали харобкорона нисбати мошини шахсии шаҳрванд Урмониддин Сафаров низ таҳти роҳбарии командири дидбонгоҳи сарҳадии Кӯк-Тоши ноҳияи Бодканд Мирбек Султонбаев сурат гирифтааст", - омадааст дар хабар.

Манобеи расмӣ бар инанд, ки афзоиши чунин "амалҳои ғаразнок" аз ҷониби ҳамсоягон таҳти ҳимояти марзбонони қирғиз вазъро ноором месозад ва аксуламали ҷиддиеро аз сӯи сокинони маҳалҳои наздимарзии Тоҷикистон метавонад ба амал орад.

Қаблан сокинони маҳаллаи Сомониён тариқи шабакаҳои иҷтимоӣ эълон карда буданд, ки ҷанҷолу моҷарои марзиро масъулини корҳои дохилӣ ва марзбонони қирғиз созмондеҳӣ ва роҳбарӣ мекунанд.

Рӯзҳои охир дар маҳаллаи Сомониёни ҷамоати Чоркӯҳ ҷаласаи фаврии мақомоти ҳукуматҳои маҳаллӣ ва ҳифзи ҳуқуқи навоҳии Исфараи Тоҷикистон ва Бодканди Қирғизистон идома дорад.

Алихони Хидирзод, омӯзгор.